Psycho's Love Interest : Chapter 7

CHAPTER 7

Zamora’s Residence. 2:50 AM.

Naka-set talaga ang alarm clock ni Dante Zamora sa 4:30 AM pero nagising na siya sa malakas na tunog na ginawa ng cellphone niya. Isang tawag na may kinalaman sa trabaho niya ang dahilan kung bakit napabangon sila bigla.

“Dante—” Bukod sa kanya ay naalimpungatan rin ang asawa niya na katabi niyang natutulog kanina. “Bakit bumabangon ka na?”

“Sa trabaho ko, Hon. I think we found another lead. Kailangan kong puntahan yun.”

“Nang ganitong oras?” Magkahalong pagtataka at pag-aalala ng asawa niya. “Kung may bagong ebidensya naman, baka pwedeng ipagpabukas—este ipagmamaya mo na lang.”

“Hindi lang tungkol sa ebidensya. Yung suspect namin dun sa kasong hawak ko, mukhang sangkot na naman sa panibagong krimen.”

Napanganga na lamang ang asawa niya. Iniisip nito na grabe na talaga ang mga krimeng nagaganap sa panahon ngayon.

“O sige, Dante. Basta mag-iingat ka dun, ah.”

Hinalikan ni Dante sa noo ang kanyang asawa at saka na ito naghanda para puntahan ang crime scene na itinawag sa kanya.

Sa Xenoville Subdivision, eksaktong 3:25 AM ay nakarating na si Dante sa mismong bahay na pinangyarihan ng krimen. Agad siyang sinalubong ng kateam niya na si Rey Bernal na mas naunang nakarating sa kanya dahil mas malapit ang tinitirahan nito.

“Detective Dante!”

“Bakit hindi pa nako-cordon out ang lugar? Residential area ‘to. Kahit madaling araw, maraming pwedeng maki-usyoso rito.”

“Pinalalagyan ko na po ng police line tape ang buong lugar, Sir.”

“Nasaan na yung officer na unang naka-respunde rito? I want the checklist for the initial action.” Utos ni Dante na agad din namang ibinigay ng tauhan niya.

Mga papel ang natanggap ni Dante at masusi niya itong binasa. Dalawang pangalan ang nakita niya sa list. Isang nagngangalang Teofisto Cariaso, ang biktima. At isang nagngangalang Pamela Yuzon, kapit-bahay ng biktima at witness sa naganap na krimen.

Nakapagsagawa na ng initial interview ang first officer kay Pamela Yuzon. Nang basahin ito ni Dante, lubos na niyang naintindihan kung bakit kunektado ang kasong ito sa unang kaso na hawak niya.

Ayon sa salaysay ni Pamela Yuzon, “Pauwi na ako galing sa trabaho nang mapansin ko ang isang mamahaling sasakyan sa tapat ng bahay ni Mr. Cariaso. Hindi ko nakita yung plate number kasi sinadyang takpan yun. Tapos, may isang di-kilalang tao ang lumabas mula dun sa bahay. Nakasuot siya ng itim na leather jacket, balot na balot, at nakasuot ng maskara na may tatlong mukha. May hawak siyang kutsilyo… duguan. Nagtago na ako para hindi niya ako makita kasi alam kong masamang tao siya. Noong pumasok na siya sa loob ng sasakyan at nagpaharurot na paalis, saka pa lang ako nakatawag sa pulis.”

Isang killer na nakasuot ng maskarang may iba’t ibang mukha. Ang Triple-face killer na ito ang siya ring suspect sa kasong hawak ngayon ni Dante na tungkol naman sa pagpatay sa isang estudyante mula sa NEU, si Miggs.

“May dala raw na mamahaling sasakyan yung suspect. Hindi kaya yun din yung sasakyan na ninakaw niya kay Miggs.” Napag-isip si Dante at napatingin sa kaharap niyang bahay ngayon. “May ninakaw rin kaya siya mula sa biktima niya ngayon?”

Nagpasya nang pasukin ni Dante ang mismong crime scene para kumalap ng impormasyon at mga ebidensya. Nakasunod sa kanya si Rey na tahimik lang. Trabaho nito na i-assist siya, kuhanan muna ng pictures ang mga ebidensya, at saka iretrieve ang mga ito.

Sa pagpasok nila ay dugo na agad ang bumungad sa entrance at sa dingding. “Naunang nagawa ng suspect ang plano niya. Isang malalim na saksak kaya ganito agad karami ang dugo, ngunit posibleng nanlaban din muna ang biktima.” Pag-aanalisa ni Dante sa isip niya. May hawak rin siyang notepad at isang ballpen para isulat kung ano ang mga obserbasyon niya.

Tumuloy na sila sa loob para sundan ang trail ng dugo. “Hinila ang biktima papunta sa sala. Pero mukhang nahirapan o nabigatan ang suspect sa paghila dahil hindi tuwid ang mga bakas ng dugo sa sahig.”

Pagdating nila sa sala, tumambad na sa kanila ang brutal at masagwang pagkamatay ng isang matandang lalaki—si Teofisto Cariaso. Ngunit bukod sa bangkay ng biktima, natuon ang atensyon niya sa magulong ayos ng bahay.

“Siguraduhin mong makuhanan mo ng litrato ang bawat anggulo nitong lugar, Rey.”

“Opo.”

Tuloy naman sa pag-aanalisa si Dante. “Sinadyang guluhin ng suspect ang lugar para mahirapan kami sa paghahanap ng ebidensya.”

Ngunit hindi ito naging hadlang para makahanap sila ng mga bagay na makakatulong sa kaso.

Isang duguang panyo sa tabi ng biktima. “Posibleng ibinusal ‘to sa loob bibig ng biktima. Posible ring sa suspect ito nanggaling.”

Isang bote ng vodka at dalawang baso. “Maaring inihanda ito ng biktima bago pa man maganap ang krimen. Ibig sabihin, inaasahan na niyang may ibang taong parating.” Tinitigan niyang mabuti ang mga baso ngunit nag-ingat na hindi ito magalaw. “Maaring isa sa mga basong ito ay ginamit ng suspect.”

Sunod na napansin ni Dante ay ang nagkalat na test papers ng mga estudyante ng biktima. “May hinahanap na papel ng estudyante yung suspect. Posibleng isa mga iyon ay may kinalaman sa naging motibo ng pagpatay.”

Lahat ng mga ebidensyang nakalap nila ay maingat na ipinreserve ni Rey para hindi ma-contaminate ang mga ito. Dadalhin ang mga ito sa crime lab upang mapag-aralan.

“Rey!”

“Yes, Detective Dante?”

“Anong oras uli nagsisimula ang pasok sa NEU?”

“6:30 AM po ang pinaka-maaga.”

“Magpunta tayo roon mamaya. Tatanungin natin sila.” Saka ipinakita ni Dante kay Rey ang section ng klase na naroon sa mga test papers na nakita nila.

= = = = =

Sa NEU campus.

Tulad ng plano, maagang nagpunta ang magkaibigan sa university para makipagkita sa kaibigang student assistant ni Shane.

Naisip na nila na kung hindi sila mahanapan ng bagong schedule na may ibang professor, baka i-drop na lang talaga ni Richelle ang subject na yun. Kahit pa next sem na lang niya ulit kunin ang subject na yun basta lang malayo siya sa manyakis na Sir Cariaso.

Ang usapan ay sa Student Affairs Office sila magkikita. Kinatok na ito ni Shane at ang nagbukas ng pinto ay ang kaibigan na niya mismo. “Pre!”

“Yow!” Nag-brofist pa yung dalawa bilang batian.

Pero medyo weird yung ikinilos ng kaibigan ni Shane. Bago sila pinapasok sa loob ay nilibot pa muna niya ng tingin ang buong paligid na para bang sinisigurado na wala nang iba pa silang kasama.

“Bawal ba kaming pumasok sa office niyo, Trent?”

“Hindi naman! Chini-check ko lang kung may ibang estudyante na sa paligid.”

“Quarter to six pa lang! Siguradong mamaya pa darating ang mga estudyante.”

“Sabi ko nga!” At saka pa lamang sila nito pinapasok sa loob. “Siya na ba yung kaibigan mong si Richelle?”

“Oo, siya na nga. Iche, ito nga pala si Trent. Yung kaibigan kong tutulong saatin.”

“Hi!” Matipid na bati ni Richelle.

May kakaibang ngiti naman sa mukha ni Trent nang magkaroon sila ng sandaling eye contact, “It’s so nice to finally meet you, Iche.”

At excited pa nga itong makipag-kamay pero kinarate-chop ni Shane ang kamay niya, “Anong Iche? Close kayo?” Hindi pa siya nakuntento, pinalipat niya si Richelle ng upuan kung saan malayo kay Trent.  “At wag mo siyang tawaging Iche. Hindi pa kayo close. Richelle lang ang itawag mo sa kanya.”

“Tss! Ang dami mong alam ‘pre. Akala ko ba magkaibigan lang kayo? Bakit binabakuran mo siya ngayon?”

“Heh! Ang dami mong napapansin.”

Pero sa totoo lang, hindi naman talaga binabakuran ni Shane si Richelle sa ibang lalaki. Pansin lang niya na wala pa rin sa mood ang kaibigan at balisa pa rin sa ibang tao kaya pakiramdam niya ay dapat niya itong protektahan.

“Kamusta na nga pala yung pinapaayos ko sayo? Meron pa bang available sched na pwedeng malipatan ni Iche?”

“Shane, mukhang ‘di na kailangan ng kaibigan mo ang magpalipat pa ng schedule.” Lumingon-lingon ulit sa paligid ang kaibigan ni Shane at saka pabulong na nagsalita. “May balita ngayon lang. Natagpuang patay si Sir Cariaso sa bahay niya.”

“Ano?” Sabay na nasabi nina Richelle at Shane dahil sa pagkagulat.

“Mukhang malaki yata yung galit nung pumatay kay Sir. Bukod sa mga saksak, pinutulan pa siya.”

“Pinutulan?” Nagtatakang tanong ni Richelle na hindi agad na-gets ang sinabi ni Trent. “Pinutulan ng ano?”

“Ng pagkalalaki.” Sagot ni Trent na para bang nandidiri at naawa sa sinapit ng propesor. “Ang saklap noh? Narinig ko sa usapan sa faculty kanina, baka raw isa sa mga babaeng estudyanteng biktima niya ang may pakana nun.”

“Biktima?”

“Ng sexual harassment.” Nang banggitin ni Trent yun, napayuko na lang ito para umiwas ng tingin kay Richelle. May ideya na rin kasi siya kung bakit gustong magpalipat ng schedule ni Richelle. “Kaya ayun. For sure naghahanap na sila ng papalit na magtuturo sa klase niyo.”

Muling nagkatinginan sina Shane at Richelle. Nabawasan na kahit papaano ang problema nila. Pero parehong may tanong sa mga isip nila. Sino ang pumatay kay Sir Cariaso?

End of Chapter 7

>>>CHAPTER 8 HERE