Wizard's Tale : Diary of a Traitor

Bakit nga ba nawala ang Prinsesa? Kinuha siya ni Allina mula kina King Hollace at Queen Alisia at nagpanggap na nanay ni Yana! Ito ang mga entries na mababasa niyo dun sa notebook na kasama sa mga pamana ni Allina na akala ni Yana noon ay walang nakasulat.

:Diary of a Traitor:

ENTRY #1

     Ilang daang taon na rin ang lumipas nang matalo ang mga ninuno namin sa isang digmaang nakapagpabago sa Otherworld. Ipinatapon sila sa pinakamadilim na parte ng mundong ito, ang “Atreria”. At ngayon, kahit lumipas na ang daang taon na iyon, nagpatuloy ang mga sumunod pang henerasyon na makulong sa lugar na ito.

     Ngunit, biglang may kumalat na balita na muling bumubuo ang leader namin ng pag-aaklas laban sa angkan na tumalo saamin noon. Susubukan ulit ng mga Hollowick na labanan ang buong White Light Clan.

      Ganun pa man… wala sa plano ko na madamay sa gulong gusto nilang simulan. Ang gusto ko na lang, ang makatakas sa lugar na ito at takasan ang buhay na kinamulatan ko.

ENTRY #2

     Kinailangan ako ng mga Hollowick. Isang pangitain daw ang lumabas na nakaguhit sa aking palad na maging tulay upang magtagumpay ang kanilang masasamang plano. Ako ay magiging instrumento upang tuluyang pabagsakin ang White Light Clan.

      Sinubukan kong tumanggi ngunit wala rin akong nagawa. Binigyan nila ako ng isang tatak ng sumpa, na sa oras na suwayin ko ang utos nila, maari ko itong ikamatay agad. Bukod doon, tinanggal nila ang kapangyarihan ko at ginawang isang ganap na mortal.

      Lahat ng ito, nakaplano na upang walang maghinala saakin.

ENTRY #3

     May isang traydor mula sa White Light Clan. Kasama siya sa mga madidilim na balak ng mga Hollowick. Hindi ko siya kilala, at wala silang balak na ipakilala siya saakin.

      Ang traydor na iyon ang nagpatakas saakin… at alam kong kahit hindi ko siya kasama, palihim siyang magmamasid sa mga gagawin ko kaya kailangan ko ng doble ingat ngayon.

ENTRY #4

      Ipinadala nila ako sa isang kakaibang lugar. Ang mga nilalang ay hindi gumagamit ng kapangyarihan. Lahat ay simple at ordinaryo. Ito na siguro ang tinatawag nilang Mortal World.

Hindi naging maganda ang mga unang araw ko sa mundong ito. Mas mahirap palang maging mortal. Walang makain, walang matuluyan, walang kapangyarihan!!! Kahit pa ang mga nalalaman kong spells, hindi gumagana.

Ngunit may nakilala akong isang lalaki na nagngangalang Samuel Rohan. Kinupkop niya ako, binigyan ng pagkain at binihisan.

Panandalian kong nakalimutan ang totoong dahilan kung bakit ako pinatakas mula sa Atreria. Masaya sa piling ni Samuel. Hindi niya ako sinasaktan, at umamin siyang nahuhulog ang loob niya saakin. Bukod doon, naiisip ko na isa na talaga akong totoong mortal, simple at ordinaryo lang ang buhay.

ENTRY #5

Isang gabi, isang estranghero hindi ko maaninag ang mukha ang nagpakita saakin. Dinala niya ako sa isang lugar na hindi ko alam at doon ay pinahirapan niya ako at ipinaalala ang misyon ko. Nagbanta siya na kapag kinalimutan ko ang plano, mamatay ako… at papatayin rin niya si Samuel.

Noong akala kong magtatagal pa ang sobrang pagpapahirap niya saakin, isang grupo ang dumating at iniligtas ako. Hindi sila mga mortal dahil nakakagamit sila ng kakaibang kapangyarihan. Natalo nila ang estrangherong nagpahirap saakin at nawala ito ng parang bula.

Nang tanungin naman ako ng mga tumulong saakin, sinabi ko sa kanila na wala akong alam sa mga nangyayari. Isa sa kanila ang nagsabing kailangang burahin ang alaala ko ngunit sa takot, nagmakaawa akong kupkupin na lang nila ako.

Bukod doon, hindi na ako pwedeng bumalik sa bahay ni Samuel. Masakit man na iwanan ko siya, ayoko namang madamay ang minamahal ko sa gulong ito.

ENTRY #6

     Isinama ako ng grupong iyon pabalik sa Otherworld. At hindi sa Atreria ang tungo namin kundi sa isang lugar na tinatawag nilang Clouds of Wilberwind. Mga Aersseys ang tumulong saakin at doon ihaharap nila ako sa Tribe master nilang si Wendel. Sila ay may dugong Lux, pamilyang kabilang sa White Light Clan.

      Mababait sila. Tinanggap ako agad ng kanilang leader. Bukod doon, nakilala ko ang anak ng leader nila na ubod ng ganda at sobrang bait. Si Miss Alisia Aersseys.

ENTRY #7

     Hindi ako nakaramdam ng lungkot o sakit sa piling ng Aersseys Tribe. Tinuring akong kaibigan ni Miss Alisia.

      Ngunit kung minsan, nakakaramdam ako ng lumbay sa tuwing naiisip ko ang lalaking iniwan ko sa mundo ng mga mortal. Dinadalangin ko na sana, nasa mabuting kalagayan si Samuel.

     Lumipas din ang panahon na hindi naman ako ginugulo ng mga taga-Hollowick. Maging ang traydor na umatake saakin noon, hindi na nagpaparamdam. Pero hindi ako nanging kampante. Alam kong pwedeng nasa paligid lang sila at nagmamasid.

      Samantala, naikasal naman si Miss Alisia sa pinakamamahal niyang lalaki… ngunit hindi basta-bastang lalaki. Si Prince Hollace, ang kasalukuyang tagapagmana ng Lux. Itinanghal sila bilang bagong Hari at Reyna ng White Light at ng buong Otherworld.

ENTRY #8

     Nang maging Reyna si Miss Alisia, naisip kong siya ang maaring punteryahin ng mga Hollowick. Siya ang magdadala ng susunod na tagapagmana ng Lux. Kung kaya naman mas lalo akong nag-ingat. Ipinatong ko sa balikat ko na ako ang dapat na mas magtanggol sa Reyna.

      Nagkaroon pa muna ng problema sa pagbubuntis si Queen Alisia, ngunit nang lumapit sila sa dakilang White Light Creature, nabiyayaan rin sila ng anak. Limang taon muna ang hinintay ng lahat bago nagkaroon ng panibagong tagapagmana ang Lux.

      Naipanganak ng Reyna ang isang malusog at magandang batang babae. Saakin niya lang unang sinabi na ‘Yana’ ang gusto niyang ipangalan sa kanyang sanggol.

      At ngayon nanjan na ang sanggol, siya naman ang ipagtatanggol ko kahit pa buhay ko ang maging kapalit nito.

ENTRY #8

      Ilang oras pa lang ang nakakalipas nang maipanganak ang bagong Prinsesa, naramdaman ko ang pananakit ng tatak ng sumpa. Isang boses rin ang naririnig ko sa aking utak, ipinag-uutos na patayin ko ang sanggol. Nagbabalik ulit sila.

      Ngunit pinigilan ko ang aking sarili at nagpakatatag. Hinding-hindi ko susundin ang gusto ng mga Hollowick. Lalong hinding-hindi ko sasaktan ang anak ng Reyna na si Prinsesa Yana.

ENTRY #9

     Patuloy ang pagsasaya ng buong palasyo. Ipinagkatiwala naman saakin ni Queen Alisia ang pagbabantay kay Yana. Hindi ko pinahahalata sa kanya na may iniinda akong lason mula sa tatak ng sumpa.

      Sa paglalim ng gabi, isang himala na nagawa kong lampasan ang sakit mula sa lason. Naisip kong marahil ay dahil nasa tabi ako ngayon ng Prinsesa at suot niya ang Lux Amulet. Tinutulungan nila ako pareho na hindi mamatay.

      Pero nagkamali ako nang inakala kong walang ibang mangyayari ngayon. Muling nagpakita ang traydor ng White Light Clan. Kung makikita ko lang sana ang totoo niyang anyo, mas mapapadali ang lahat.

      May gamit siyang kutsilyo na may kulay itim na likido sa patalim nito. Alam kong lason ito na mas madaling papatay sa sanggol. Nang subukan niyang saksakin ang Prinsesa, binuhat ko siya at iniiwas sa atake nito.

      Sinubukan pa sana niyang gamitan ako ng kakaibang kapangyarihan ngunit bago mangyari iyon, nabalot kami ng liwanag na nagmumula sa Lux Amulet at sa muling pagdilat ko… wala na kami ng Prinsesa sa loob ng palasyo. Ang lugar na aming napuntahan, ang Mortal World.

     Balak ko sanang bumalik sa Otherworld para ibalik ang Prinsesa kina Queen Alisia ngunit isang boses din ang narinig ko.

      Nagsasabi na kapag bumalik ako sa Otherworld, matutupad ang pangitain na ako ang magiging tulay sa pagbasak ng White Light Clan. Kailangan kong iligtas at alagaan ang Prinsesa, ilayo siya sa gulo at huwag na munang bumalik sa Otherworld. Sa pamamagitan nito, hindi magagawa ng mga Hollowick ang plano nila.

ENTRY #10

     Gamit ang kapangyarihan ng Lux Amulet, isang tao lamang ang naisip kong lapitan, si Samuel. Naging emosyonal ang muli naming pagkikita. Sinabi ko sa kanya ang buong katotohanan tungkol sa pagkatao ko, sa mundong pinanggalingan ko at sa sanggol na dala ko. Naniniwala naman siya at nangakong itatago itong sekreto at tutulong siyang protektahan kami.

      Nagpakalayu-layo kami at nagtago sa kapangyarihan ng Lux. Hindi rin nagtagal, pinakasalan niya ako at tinuring naming anak ang Prinsesa. Dinala niya ang pangalang Alyanna Rohan at ituturing namin siyang sarili naming anak habang nasa puder namin siya.

ENTRY #11

      Lumipas ang ilang taon at nagawa naming magtago para saaming kaligtasan. Ang laki ng tulong ng Lux Amulet dahil bukod sa proteksyon upang hindi kami matunton ng mga Hollowick, pinipigilan nito ang tatak ng lason na hanggang ngayon ay nasa aking katawan pa rin.

      Napalaki rin namin ng maayos si Prinsesa Yana. Lagi kong sinasabi sa kanya bago siya matulog na mapapasakanya ang kwintas sa pagtungtong niya ng tamang edad. Kapag nangyari iyon, maari na akong mamatay ngunit mamatay ako na masaya.

      Hanggad ko na maayos na makakabalik ang Prinsesa sa tunay niyang tahanan, at tunay niyang mga magulang.

Hindi nagawa pang isulat ni Allina ang pinakamahalaga at huling pangyayari sa buhay niya. Ngunit, ito ang kwentong nagsimula sa pagbabago ng buhay ni Yana.

Isang gabi sa bahay ng mga Rohan, nakaramdam ng kakaiba si Allina. Muli niyang narinig ang boses na tumutulong sa kanya noon at nagmumula iyon sa suot niyang Lux Amulet.

Sinasabing hindi na niya maabutan pa ang pagdadalaga ang Prinsesa. Mamatay siya at ang kanyang asawa sa gabing iyon. Ang sakripisyong gagawin nila ang magiging daan upang makabalik ang Prinsesa sa tunay niyang tahanan. Ito ang daan upang tuluyan nang matalo ang kasamaan ng mga Hollowick.

Nang malaman ito ni Allina, sinabi niya ito kay Samuel at pumayag naman ito. Sobrang mahal ni Samuel si Allina at ang turing niya kay Yana ay tunay nang anak. At kahit puno na ng takot ang mag-asawa sa nalalabi nilang mga oras, sinunod nila ang utos ng boses na naririnig nila.

Sa kwarto ng Prinsesa, gumuhit sila ng isang special protection circle sa sahig at sakop nito ang buong kwarto. Nang patulugin na nila ang Prinsesa, itinabi nila sa kanyang pagtulog ang Lux Amulet.

Sumunod ay sumulat na ng huling testamento ang mag-asawa na maglilipat sa nag-iisa nilang anak na si Yana ang lahat ng kanilang ari-arian. Kabilang nito ang Lux Amulet at mga gamit ni Allina.

Nang dumating na ang oras na kanilang kinatatakutan, sinugod ng mga nilalang ang buong bahay. Namatay sina Allina at Samuel, at inakala ng mga ito na wala sa loob ng bahay na yun ang Prinsesa.

Dito nailigtas si Yana… at magpapatuloy ang buhay niya hanggang sa dumating ang takdang panahon na makakabalik siya sa kanyang palasyo.

Sa huling pahina ng iniwang notebook ni Allina, heto ang nakasulat:

      Mahal na Reyna, kung mababasa niyo po ito. Patawarin niyo ako sa paglayo ko sa inyong anak. Ginawa ko ito para iligtas si Yana at bilang pagtanaw ng utang na loob sa inyong angkan. Binago niyo ang aking buhay, kayo po ay lubos kong minamahal.

      Hindi ko hahayaang magtagumpay ang mga masasamang plano ng iba laban sa tagapagmana ng Lux. Dinadalangin ko ang araw na haharap sa inyong muli ang Prinsesa upang ihingi ako ng tawad at upang ipaalam sa inyo na ako ay nananatiling inyong matapat na tagasunod.

Sumasainyo,

Allina Hollowick

>>>WT2: Cursed Tribe of Snow Vetters